مراجعة مسلسل Sweet Tooth بدون حرق

مراجعة مسلسل ” Sweet Tooth ” …. ( مغامرة – دراما – اكشن ) . ” لا يوجد حرق لأحداث المسلسل ”

قصة المسلسل :

بكل بساطة بتبدأ مع ظهور ڤيروس معدى بيهدد بفناء البشرية ، و بالفعل بينجح فى هذا …. و فى نفس وقت ظهور الفيروس تحدث اشياء غريبة ، و هى أن أى امرأة حامل تلد اطفال هجينة بين البشر و الحيوانات …. و هذا ينقلنا لبطل قصتنا ” غاس ” الذي مثل ما هو واضح فى الصورة أن نصه انسان و نصه غزال … و بتبدأ قصته عندما يهرب به ابيه إلى غابة معزولة بعد ولادته لحمايته من اضطهاد البشر للأطفال المهجنين …. و يظل معزول فى الغابة لمدة ٩ سنوات إلى ان يموت والده …. فيبدأ ” غاس ” رحلة إلى العالم للبحث عن والدته ، و يقابل شخص ما و يطلب منه أنه يوصله للمكان الذي يريده …… وهنا تبدأ رحلة ” غاس ” المحملة بالكثير و الكثير جدا من المخاطر و المفاجأت و الاسرار ، و نعيش معاه مغامرة ، و نرى معاه شكل العالم لأول مرة و التغييرات التي حدثت به ، و ما هو وضع الڤيروس ، و وضع المهجنين ، و وضع البشر المتبقيين …مبدئيا لمن يبحث عن عامل فائق المتعة ، و أحداث متزنة ، و تعيش فيه أجواء المغامرة و الحكايات الخيالية ، و ممكن اكمل المسلسل سريعاً ….. و الاهم من ذلك أنه عائلي و مناسب لأي فرد ، و خالي تمامًا من اى مشاهد خارجة أو دموية ، فكل كلامى ينطبق على هذا المسلسل .زى ما واضح أن المسلسل عجبنى جدا ، و ده لانه عنده قصة حلوة جدا ، و عرف يدى كل حاجة وقتها ، و ايقاع المسلسل مظبوط جدا …. كمان المسلسل احنا طول الوقت معانا خط احدثنا الرئيسى الى هو رحلة ” غاس ” ، و دى مش هتزهق منها و هتبقى مترقب كل حاجة هتحصل …. و ده لانها زى ما بقول رحلة ، فمش بنكون ثابتين فى مكان احنا طول الوقت بنتحرك فى اتجاه هدفنا ، و بنواجه المخاطر و بنتعرف على العالم ، و بنكتشف أسرار جديدة … فى نفس الوقت بيبقى معانا خطوط أحداث لشخصيات تانية ممتعة جدا برضه ، و بنتابع كل الخطوط عشان نشوف نقطة تلاقى الخطوط مع بعض . المسلسل الجانب الدرامى فيه ممتاز ، و عرف ازاى يخليك تتعلق بشخصياته من اول موسم ، و تفهم دوافعهم و تتفاعل مع كل حاجة بيمروا بيها …. وفيه مشاهد جميلة جدا دراميا . على مستوى الأكشن فالمسلسل مكنش مبالغ فى الاكشن ، هو بيحصل فى وقته بس ، و كان المشاهد متصممة بشكل حلو …. و مش بس مشاهد الاكشن المسلسل من الناحية البصرية جميل جدا ، و فيه مشاهد واسعة كتير هتحسسك اكتر بروح المغامرة . مسلسل ” Sweet Tooth ” فاجئنى الحقيقة ، المسلسل ممتع جدا ، و ليه روح و طابع خاص بيه ، و اظن اى حد هيشوفه سهل يحبه و هيكمله للآخر ، و نهاية الموسم موفقة جدا ، و بتبشر بأن القادم اقوى فى المواسم القادمة . المسلسل من احدث انتاجات ٢٠٢١ من Netflix ، و متاح دلوقتى اونلاين و تقدروا تشوفوه من اى مكان …. المسلسل مكون من ٨ حلقات و متوسط مدة الحلقة ٤٥ دقيقة . و الى شاف المسلسل يقولنا رأيه فى الكومنتات .

تقييمي للمسلسل …… ( 8 / 10 ) .